Il tempo

'O Tiempo
(31 Dicembre 2000)
Si m'affaccio 'a fenesta, veco 'o mare;
è sempe 'o stesso: 'a tanto tiempo fa!
Però, 'n'anno, nu secolo è fernuto;
anz'è millennio mo' ca se ne va.
'O tiempo nun cunosce mai fermate,
ma nce ne lassa tracce 'a raccuntà!
Nui', ca penzammo d'essere 'e padroni,
nun ce accurgimmo d'esse nullità
'nt'a 'st'universo bello e senza tiempo:
nce cunfruntammo cu ll'eternità!
Pe' chi nun 'a vo' lèggere, 'sta storia
è libbro ca nun sape fà 'mparà.
Sto sècolo ca già conta 'e minuti
appriesso se ne porta 'nfamità!
Guerra, violenza, e po' sopraffazzione,
odio, famma, mancanza 'e libbertà;
'a delinquenza -pubblica e privata:
a chesti cose avéssemo penzà.
Però, si 'ncielo splenne sempe 'a Luce,
'ncopp'a 'sta terra ancora mannarrà
nu raggio assai lucente pe' chist'uòmmene,
e 'na speranza nova nasciarrà.
'A vita ca sciurisce ogne matina
è troppo bella: nun se po' sciupà.
(dall'antologia "Sabba Duemila")